ភ្នំពេញ៖ លោកនាយករដ្ឋមន្ត្រី ហ៊ុន សែន បានប្រកាសពីគោលដៅរបស់រដ្ឋាភិបាល ជាថ្មីម្តងទៀត ក្នុងការដំឡើងប្រាក់ខែដល់មន្ត្រីរាជការនៅឆ្នាំ ២០១៦ខាងមុខនេះ ។ ពីពិធីសម្ពោធស្ពាន មិត្តភាពកម្ពុជា-ចិន (ជ្រោយចង្វារទី២) នៅថ្ងៃទី២២ តុលានេះ លោកនាយករដ្ឋមន្ត្រីអះអាងថា រដ្ឋាភិបាលនឹងដំឡើងប្រាក់ខែមន្ត្រីរាជការស៊ីវិល និងប្រាក់ខែកងកម្លាំងប្រដាប់អាវុធ ជាពីរដំណាក់កាល គឺក្នុងខែមករា និងមុនចូលឆ្នាំប្រពៃណីជាតិ នៅក្នុងឆ្នាំ២០១៦ ខាងមុខ។ បើតាមលោកនាយករដ្ឋមន្ត្រី គ្រូបង្រៀនទូទាំងនឹងទទួលប្រាក់ខែទាបបំផុត ២០០ដុល្លារ ក្នុងមួយខែ នៅឆ្នាំ២០១៦ ។
គួររម្លឹកថា កាលពីចុងខែមករា ឆ្នាំ២០១៥នេះ លោកនាយករដ្ឋមន្ត្រី បញ្ជាក់នៅក្នុងពិធីចែកសញ្ញាបត្រដល់និស្សិតនៅខេត្តស្វាយរៀង ថា ការដំឡើងប្រាក់ខែមន្ត្រីរាជការ និងកងម្លាំងប្រដាប់អាវុធ នឹងធ្វើឡើងជារៀងរាល់ឆ្នាំ ។ កាលណោះ លោកថា នៅឆ្នាំ ២០១៨ ខាងមុខនេះ ទាំងប្រាក់ខែមន្ត្រីរាជការស៊ីវិល និងប្រាក់ខែកងកម្លាំងប្រដាប់អាវុធ រដ្ឋាភិបាលរបស់លោក នឹងដំឡើងយ៉ាងតិច ក៏ ១លានរៀលដែរ។
គួររម្លឹកផងដែរ ក្រៅពីដំឡើងដល់មន្ត្រីរាជការស៊ីវិល កាលពីថ្ងៃទី២៥ ឧសភា ឆ្នាំ២០១៥កន្លងមក រដ្ឋាភិបាលបានចេញអនុក្រឹត្យថ្មីស្តីពីការកំណត់ ប្រាក់ឧបត្ថម្ភប្រចាំខែប្រធានក្រុមប្រឹក្សាឃុំសង្កាត់ សមាជិកក្រុមប្រឹក្សាឃុំ សង្កាត់ដែរ។ ប្រាក់ឧបត្ថម្ភថ្មីនោះ ប្រធាន និងសមាជិកក្រុមប្រឹក្សាឃុំ សង្កាត់ ទទួលប្រាក់ខែថ្មី ពី៣៥ម៉ឺន ដល់៥៧ម៉ឺនរៀល៕
(ដកស្រង់ពី http://www.thmeythmey.com/)
