កម្ពុជាប្រគល់ផែនទីអោយអង្គការសហប្រជាជាតិវិញ


Map Back 27 08 15 2 copy

ពិធី​ប្រគល់​ផែន​ទី​ដើម ​UTM ខ្នាត​មួយ​លើ​មួយ​រយ​ពាន់ បាន​ប្រព្រឹត្ត​ទៅ​នៅ​ព្រឹក​ថ្ងៃទី​២៦​ សីហា​នេះ នៅ​វិមាន​សន្តិភាព ដែល​បង្ហាញ​នូវ​ការ​បញ្ចប់​ករណី​មួយ​ រវាង​រាជរដ្ឋាភិបាល​ និង​អង្គការ​សហ​ប្រជាជាតិ​ លើ​ការ​សុំ​ខ្ចី​ផែនទី​ដើម្បី​យក​មក​ផ្ទៀង​ផ្ទាត់​ ។
    ឯកឧត្តម​ឧប​នាយក​រដ្ឋ មន្ត្រី​ហោ ណាំហុង រដ្ឋមន្ត្រី​ក្រសួង​ការ​បរទេស​កម្ពុជា បាន​ប្រគល់​ឯកសារ​ផែនទី​ជា​ផ្លូវ​ការ​ ១៨​ផ្ទាំង​នេះ ជូន​ចំពោះ​ លោក​ស្រី មេរៀនី កេលីទី វ៉ាកាស៊ីស៊ី កាកាឡា ប្រធាន​ស្តីទី​បណ្ណាល័យ​អង្គការ​សហ​ប្រជាជាតិ នៅ​ចំពោះ​វត្តមាន​ចូល​រួម​ផង​ដែរ​ ពី​មន្ត្រី​ផ្នែក​ច្បាប់​នៃ​អង្គការ​សហ​ប្រជាជាតិ​ លោក កេអ៊ីឈីរ៉ូ អូគី​ម៉ូតូ​​…និង​មន្ត្រី​ជាន់​ខ្ពស់​រាជរដ្ឋាភិបាល​ជា​ច្រើន​ទៀត​ ។
ការ​ប្រគល់​ផែន​ទី​ដើម UTM ចំនួន ​១៨​ផ្ទាំង អោយ​អង្គការ​សហ​ប្រជាជាតិ វិញ​នេះ គឺ​នៅ​បន្ទាប់​ពី​ការ​ផ្ទៀង​ផ្ទាត់​ជា​ផ្លូវ​ការ​កាល​ពី​ថ្ងៃទី​២០​ សីហា បាន​បង្ហាញ​ថា​ផែនទី UTM ខ្នាត​មួយ​លើ​មួយ​រយ​ពាន់​ដែល​តម្កល់​ទុក​នៅ​បណ្ណាល័យ​អង្គការ​សហ​ប្រជាជាតិ ដូច​គ្នា​បេះ​បិទ​នឹង​ផែនទី​បោន​ខ្នាត​មួយ​លើ​មួយ​រយ​ពាន់​របស់​រាជរដ្ឋាភិបាល​កម្ពុជា ដែល​បាន​និង​កំពុង​ប្រើ​ប្រាស់​ក្នុង​ការ​បោះ​បង្គោល​ព្រំដែន និង​កសាង​ព្រំដែន​សន្តិភាព​ជាមួយ​នឹង​ប្រទេស​ជិត​ខាង ជា​ពិសេស​ជាមួយ​នឹង​ប្រទេស​វៀតណាម​។
    ឯកឧត្តម​ ហោ ណាំហុង បាន​ស្នើ​សុំ​អោយ​គណបក្ស​នយោបាយ​ប្រឆាំង​ បញ្ឈប់​ការ​ប្រើ​នយោបាយ​ប្រជាភិថុត​ផែនទី​​… ដោយ​បាន​បង្ហើប​ថា​អ្នក​ប្រើ​នយោបាយ​ប្រជាភិថុត​ទាំង​នោះ នឹង​អាច​ដឹង​កាន់​តែ​ច្បាស់​ថែម​ទៀត​អំពី​បញ្ហា​ផែន​ទីនេះ ដែល​គេ​នឹង​រំពឹង​ថា​​នឹង​អាច​កើត​ឡើង ​នៅ​ប្រមាណ​មួយ​សប្តាហ៍​ទៅ​មុខ​ទៀត ។
ទាក់​ទង​នឹង​បញ្ហា​ផែន​ទី​នេះ​ផង​ដែរ កម្ពុជា​ក្នុង​ជំហាន​បន្ទាប់​ទៅ​ទៀត​នេះ ត្រូវ​គេ​រំពឹង ថា​កំពុង​រង់​ចាំ​ការ​ឆ្លើយ​តប​ពី​ប្រធានាធិបតី​ប្រទេស​បារាំង ​លោក​ ហ្វ្រង់ ស្វ័រហូឡង់ ជុំវិញ​ការ​ស្នើ​របស់ ប្រមុខ​រាជរដ្ឋាភិបាល​កម្ពុជា​ លើ​បញ្ហា​ផែនទី​សម្រាប់​ផ្ទៀង​ផ្ទាត់ ​។ ដោយ​ឡែក​សេចក្តី​ស្នើ​ទៅ​ប្រទេស អង់គ្លេស​លើ​បញ្ហា​ផែនទី ត្រូវ​គេ​ឃើញ​ថា​បាន​ឆ្លើយ​តប​មក​វិញ​តាម​រយៈ​នាយក​រដ្ឋមន្ត្រី​អង់គ្លេស​លោក​ដេវីធ ខេមរុន នោះ​ហើយ​…ហើយ​គេ​កំពុង​រង់​ចាំ​ការ​ឆ្លើយ​តប​នេះ​ផង​ទៀត ពី​សហរដ្ឋ​អាមេរិក ផង​ដែរ​ ។