អូររាំងឪ ២២ កក្កដា ២០១៨៖ ឯកឧត្តម សាយ សំអាល់ បេក្ខជនតំណាងរាស្ត្រមណ្ឌលត្បូងឃ្មុំ ជួបសំណេះសំណាលជាមួយសមាជិក សមាជិកាគណបក្សប្រជាជនកម្ពុជា ក្នុងយុទ្ធនាការឃោសនារកសម្លេងឆ្នោត នៅភូមិសោយ ឃុំមៀន ស្រុកអូររាំងឪខេត្តត្បូងឃ្មុំ ។
ឯកឧត្តម បានថ្លែងថា រាជរដ្ឋាភិបាលដឹកនាំដោយគណបក្សប្រជាជនកម្ពុជាជានិច្ចកាលប្រកាន់ខ្ជាប់នូវគោលការណ៍ ឧត្តមគតិ និងគោលជំហរដ៏មោះមុតរបស់ខ្លួន ក្នុងការដឹកនាំប្រទេស ដោយមានមាគ៌ានយោបាយដ៏ត្រឹមត្រូវ ដើម្បីបុព្វហេតុជាសារវ័ន្តចម្បងៗចំនួន៤គឺ
១) ការពារឯករាជ្យ អធិបតេយ្យ បូរណភាពទឹកដី និងកិត្យានុភាពកម្ពុជាលើឆាកអន្តរជាតិ
២)ទប់ស្កាត់ការវិលត្រឡប់នៃរបប ប្រល័យពូជសាសន៍ប៉ុលពត
៣) ធានាការពារសុខសន្តិភាព ស្ថិរភាព និងការបង្រួបបង្រួមឯកភាពជាតិ ទឹកដី ក្រោមដំបូលរដ្ឋធម្មនុញ្ញតែមួយ និង
៤)ស្តារ កសាង ការពារ និងអភិវឌ្ឍប្រទេសជាតិឱ្យមានការរីកចម្រើនលើគ្រប់វិស័យ។ ទាំងនេះគឺជាបំណងជាយុទ្ធសាស្ត្ររបស់គណបក្សប្រជាជនកម្ពុជា ដែលឆ្លុះឱ្យឃើញនូវបំណងប្រាថ្នាដ៏ពិសិដ្ឋរបស់ប្រជាជនកម្ពុជាគ្រប់ៗជំនាន់។
