អភិបាលខេត្តត្បូងឃ្មុំ៖ ការរីកចម្រើនវិស័យពុទ្ធិចក្រ និងអណាចក្រ ត្រូវពឹងផ្អែកលើកត្តាសុខសន្តិភាព ស្ថេរភាពនយោបាយ និងសុវត្ថិភាពសង្គមជាចម្បង

ឯកឧត្តម លី ឡេង បានលើកឡើងថា កម្ពុជាបានឆ្លងកាត់ប្រវត្តិសាស្ត្រដ៏ជូរចត់ជាច្រើនជំនាន់ ដែលបណ្តាលមកពីភ្លើងសង្គ្រាម ហើយសង្គ្រាមបានបង្កវិនាសកម្ម សោកនាដកម្ម អន្តរាយហិនហោចប្រទេសជាតិគ្រប់បែបយ៉ាង ជាក់ស្តែងបានបន្សល់ទុក ស្ត្រីមេម៉ាយ ក្មេងកំព្រា ជនអនាថាគ្មានទីពឹង ជាដើម។
ឯកឧត្តម អភិបាលខេត្ត បានបន្តថា កម្ពុជាបច្ចុប្បន្នបានវិវឌ្ឍន៍ខ្លួនជាប្រទេសដែលមានចំណូលគួរសម បើប្រៀបធៀបជាមួយបណ្តាប្រទេសក្នុងតំបន់ និងបន្តការអភិវឌ្ឍលើគ្រប់វិស័យដោយឥតឈប់ឈរ ប៉ុន្តែដើម្បីរក្សាបាននូវការរីកចម្រើននេះ ត្រូវពឹងផ្អែកលើកត្តាសុខសន្តិភាព ស្ថេរភាពនយោបាយ និងសុវត្ថិភាពសង្គមជាចម្បង។
ឯកឧត្តម លី ឡេង បញ្ជាក់ថា ដើម្បីថែរក្សាការពារសុខសន្តិភាពនេះបាន ចាំបាច់ត្រូវពឹងផ្អែកឲ្យមានការចូលរួមពីប្រជាពលរដ្ឋទូទៅ ហើយការចូលរួមនេះពុំចាំបាច់ចំណាយអ្វីទាំងអស់ គឺគ្រាន់តែបន្តគាំទ្ររាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខ ដើម្បីបន្តគ្រប់គ្រងប្រទេស ព្រោះមានតែសម្តេចទេ ដែលមានសមត្ថភាពគ្រប់គ្រាន់ក្នុងការដឹកនាំប្រទេស ទាំងធនធានមនុស្ស និងធនធានដទៃទៀត។
ជាពិសេស សូមប្រជាពលរដ្ឋកុំជឿតាមការញុះញង់ លាបពណ៌ បំបែកបំបាក់ នាំឲ្យមានការប្រកាន់ពូជសាសន៍ ព្រោះជាហេតុបណ្តាលឲ្យមានការបែកបាក់សាមគ្គីជាតិ។
ជាចុងក្រោយ ឯកឧត្តម លី ឡេង អភិបាលខេត្តត្បូងឃ្មុំ បានថ្លែងអំណរគុណដល់សប្បុរសជននានា ដែលបានបរិច្ចាគថវិកា ដើម្បីឧបត្ថម្ភដល់ការសាងសង់សមិទ្ធផលនានាក្នុងទីអារាមនេះ និងកាត់ខ្សែបូរសម្ពោធដាក់អោយប្រើប្រាស់ជាផ្លូវការ ចាប់ពីពេលនេះតទៅ ៕ #Tychhaylorn