ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ ថ្លែងប្រាប់អោយប្រជាពលរដ្ឋជឿទុកចិត្តលើរាជរដ្ឋាភិបាលកម្ពុជា ដែលមានសម្តេចតេជោ ជាប្រមុខដឹកនាំ ដើម្បីបន្តកសាងវិស័យពុទ្ធចក្រ និងអាណាចក្រ អោយកាន់តែរីកច្រើនជាបន្តទៀត!!


ត្បូងឃ្មុំ៖ នៅព្រឹកថ្ងៃទី២៥ ខែកុម្ភៈ ឆ្នាំ២០១៩នេះ ក្នុងឱកាសឯកឧត្តមបណ្ឌិត​ ជាម ច័ន្ទសោភ័ណ តំណាងឯកឧត្តម ឧបនាយករដ្ឋមន្ត្រី ជា​ សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់​ អញ្ជើញជាអធិបតីភាពកាត់ខ្សែបូសម្ពោធរោងស្គរ និងផ្លូវក្រាលគ្រួសក្រហម១ខ្សែ ក្នុងវត្តសំរោងបុរី ហៅវត្តសំរោង ក្នុងឃុំមង់រៀវ​ ស្រុកត្បូងឃ្មុំ​ ខេត្តត្បូងឃ្មុំ ដែលសមិទ្ធផលទាំងនេះក្រោមការជួយឧបត្ថម្ភពី ឯកឧត្តមឧបនាយករដ្ឋមន្ត្រី ជា សុផារ៉ា​ និងឯកឧត្តម ទេព ធន ប្រធានក្រុមការងារចុះជួយឃុំមង់រៀវ ឃុំជប់ និងឃុំជីគរ ព្រមទាំងសប្បុរសជនជិតឆ្ងាយ។

ក្នុងឱកាសនោះ ឯកឧត្តមបណ្ឌិត​ ជាម​ ច័ន្ទសោភ័ណ មានសទ្ធាជ្រះថ្លា ចូលបច្ច័យកសាងវត្ត និងទុកប្រើប្រាស់ទូទៅបំរើអោយវិស័យព្រះពុទ្ធសាសនា ក្នុងទីអារាមនេះ នូវថវិការចំនួន២០លានរៀល ព្រមទាំងជូនថវិការដល់តាជីយាយជី១០០នាក់ ម្នាក់ៗ១ម៉ឺនរៀល លោកគ្រូអ្នកគ្រូបង្រៀន៤២នាក់ ម្នាក់ៗ ២ម៉ឺនរៀល, លោកគ្រូអ្នកគ្រូពេទ្យ ១០ម៉ឺនរៀល, កងកម្លាំងប្រដាប់អាវុធ និងប្រជាការពារចំនួន២៧ម្នាក់ ម្នាក់ៗ២ម៉ឺនរៀល និងសិស្សានុសិស្ស ប៉ិច២ដើម សៀវភៅ២ក្បាលផងដែរ៕