ឯកឧត្ដម ហ៊ុន ម៉ាណែត ៖ ក្រៅពីកិច្ចការយោធា ខ្ញុំក៏បានទទួលការណែនាំពីសម្តេច អោយចុះជួបជាមួយលោកគ្រូអ្នកគ្រូនៅតាមបណ្តាសាលាមួយចំនួន ដើម្បីពិនិត្យស្ថានភាពជាក់ស្តែង ក៏ដូចជាពិនិត្យនិងដោះស្រាយសំណូមពរចាំបាច់មួយចំនួនរបស់លោកគ្រូអ្នកគ្រូ និងក្មួយៗសិស្សានុសិស្សនៅទីនោះ។ ជាលទ្ធផលនៅថ្ងៃព្រហស្បតិ ទី ១៧ សីហានេះ ខ្ញុំនិងក្រុមការងារ បាន÷
១) នៅ សាលាបឋមសិក្សា អនុវិទ្យាល័យ នៅអូរពងមាន់ ខេត្តស្ទឹងត្រែង: ពិនិត្យការសាងសង់អគារសិក្សា ១ខ្នង កំពស់៣ជាន់ មាន១៨បន្ទប់ ដែលជាអំណោយដ៏ថ្លៃថ្លារបស់សម្តេចតេជោ។ ដើម្បីកុំអោយក្មួយៗដែលរៀនចប់អនុវិទ្យាល័យនេះមានការលំបាកក្នុងការទៅរៀននៅវិទ្យាល័យផ្សេងដែលឆ្ងាយពីផ្ទះ សម្តេចបានផ្តល់គោលការណ៏ទៅក្រសួងអប់រំដើម្បីតំឡើងអនុវិទ្យាល័យនេះអោយក្លាយទៅជាវិទ្យាល័យតែម្តង;
២) នៅសាលាបឋមសិក្សាអូរឬស្សីកណ្តាល នៅស្រុកសៀមបូក ខេត្តស្ទឹងត្រែង: ដោយសារកំណើនចំនួនសិស្សានុស្សិសដែលតម្រូវការថ្នាក់រៀនបន្ថែម សម្តេចនឹងផ្តល់ជូននូវអគារសិក្សា ១ខ្នង ៦បន្ទប់ និងអគារស្នាក់នៅរបស់លោកគ្រូអ្នកគ្រូដែលមកពីខេត្តផ្សេង ១ខ្នងផងដែរ;
៣) វិទ្យាល័យ ញឹម វណ្ណដា ពារាំង ខេត្តព្រៃវែង: ឆ្លើយតបតាមសំណូមពររបស់លោកគ្រូអ្នកគ្រូនិងមាតាបិតាសិស្ស សម្តេចបានសម្រេចផ្តល់ជូននូវអគារសិក្សា ១ខ្នង កំពស់ ៣ជាន់ មាន ២១បន្ទប់ អគារទីចាត់ការ ១ខ្នង តារាងបាល់បោះ និងចាក់ដីតារាងបាល់ទាត់សម្រាប់ក្មួយៗលេងកីឡា។
